Gönguferð

Það er fátt betra en að reima á sig gönguskóna, skella góðu nesti í bakpoka og skunda af stað í góðum félagsskap. Sérstaklega ef það er upp um fjöll og firnindi um íslenska náttúru.

Því ætlum við að skella í eina góða göngu þann 14. Júní þar sem við munum ganga frá Grundarfirði (Grundará) og yfir í Lýsuhólslaug. Við verðum með fararstjóra sem hefur áralanga reynslu af hálendisgöngu og jöklagöngu ásamt því að vera þaul vanur björgunarsveitarmaður.

Mæting er á bílastæðinu við Grundará klukkan 9:30 og hefst gangan á að gengið verður upp að Grundarfossi og þaðan verður gengið inn Hróksdal og um Lýsuskarð.

Æskilegt er að þátttakendur séu vanir gönguferðum og útivist. Gengið er í fjölbreyttu landslagi, en á köflum er gengið í hrjóstrugu landslagi sem er þungt undir fótinn, og mikilvægt að vera í góðum skóm með ökklastuðningi. Búast má við 12-14 kílómetra göngu með 7-800 metra hækkun og að gangan taki 6-8 klukkustundir. Erfiðasti hluti göngunnar er í lokinn.

Ekkert símasamband er á hluta leiðarinnar.

Göngufólk þarf að hafa með vind- og vatnsheldan fatnað og nesti í bakpokanum. Nóg er af drykkjarvatni allan fyrri hluta göngunnar.

Ef veðurspáin bregst er sunnudagurinn 15. júní göngudagur til vara.

Fararstjóri er Guðmundur Rúnar Svansson.

Ef þú hefur einhverjar spurningar, ekki hika við að hafa samband.

---